ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថា សម្ដេចនឹងមិនឲ្យតំបន់អង្គរត្រូវបានដកចេញពីសម្បត្តិបេតិកភណ្ឌពិភពលោកនោះទេ។
ថ្លែងនៅក្នុងពិធីប្រគល់សញ្ញាបត្រជូននិស្សិតវិទ្យាស្ថានវ៉ាន់ដា ព្រឹកថ្ងៃទី៣ ខែតុលា ឆ្នាំ២០២២
សម្ដេចតេជោ ហ៊ុន សែន ថាក្នុងពេលនេះគឺរដ្ឋាភិបាលប្រើវិធីសាស្ត្រទន់ភ្លន់ក្នុងការស្នើឲ្យពលរដ្ឋចាកចេញពីតំបន់អង្គរ ខណៈសម្ដេចបន្តថាទៅថ្ងៃមុខទៀតបើសិនជាមានពលរដ្ឋណារឹងទទឹងមិនព្រមចាកចេញ រដ្ឋាភិបាលនឹងអនុវត្តវិធានការរដ្ឋបាលហើយពេលនោះសូម្បីតែសំណងក៏ពុំមានជូនដែរ។
បច្ចុប្បន្នមានពលរដ្ឋប្រមាណជាង ៦ ០០០គ្រួសាររួចហើយដែលត្រូវបានរដ្ឋាភិបាលសម្រេចផ្ដល់សំណងដើម្បីដោះដូរឲ្យពួកគាត់ផ្លាស់ប្ដូរពីតំបន់អង្គរ ទៅភូមិធម្មជាតិរុនតាឯក ក្នុងស្រុកបន្ទាយស្រី ខេត្តសៀមរាប។
ការដោះដូរឲ្យពលរដ្ឋផ្លាស់ប្ដូរទៅភូមិរុនតាឯកនេះ គឺដោយសារតែអង្គការយូណេស្កូបានលើកឡើងថាសំណង់ដែលបានសាងសង់ក្នុងតំបន់អង្គរបានប៉ះពាល់ទៅដល់តំបន់អង្គរដែលត្រូវតែរុះចេញ ខណៈបើសិនបន្តឲ្យមានបញ្ហានេះបន្ត គឺតំបន់អង្គរប្រឈមនឹកការដកចេញពីសម្បត្តិបេតិកភណ្ឌពិភពលោក៕
PHOTO: Yuthkun